कास्की–३ मा घण्टीको सशक्त प्रवेश: परिवर्तनको संकल्प बोकेर बिना गुरुङ दौडमा
“भ्रष्टाचार र विसंगति हटाउन यो अभियान जारी रहनेछ, जनताले देखाएको उत्साह नै हाम्रो जितको आधार हो।”
कास्की – राष्ट्रिय स्वतन्त्र पार्टी (रास्वपा) ले आगामी उपनिर्वाचनको लागि कास्की क्षेत्र नं. ३ मा आफ्नो उपस्थिति बलियो बनाउन चुनावी गतिविधि तीव्र पारेको छ। यस क्षेत्रकी प्रतिनिधिसभा सदस्य उम्मेदवार बिना गुरुङले परिवर्तनको संकल्प बोकेर घरदैलो तथा अन्तरक्रिया कार्यक्रमहरूलाई निरन्तरता दिइरहेकी छन्।
चुनावी माहोललाई तताउँदै गुरुङले पोखरा महानगरपालिकाका विभिन्न वडा तथा बजार क्षेत्रमा मतदाताहरूसँग भेटघाट सम्पन्न गरेकी छन्। उनले पोखरा–२४, पामे बजारमा बिहानैदेखि स्थानीय दाजुभाइ, दिदी–बहिनी तथा आमा–बुवाहरूसँग अन्तरक्रिया गरिन्। यस क्रममा उनले मतदाताहरूको गुनासो सुन्दै आफ्नो पाँच वर्षे योजना प्रस्तुत गरेकी थिइन्।
गुरुङको चुनावी टोलीले पोखरा महानगरपालिका–२३ स्थित मार्गी गोल चौतारामा युवा तथा ज्येष्ठ नागरिकहरूसँग महत्त्वपूर्ण अन्तरक्रिया र परिचय कार्यक्रम सफलतापूर्वक सम्पन्न गर्यो। यस कार्यक्रममा विशेषगरी युवाहरूको उल्लेख्य सहभागिताले रास्वपाप्रति देखिएको आकर्षण स्पष्ट पारेको थियो। भ्रष्टाचार र विसंगतिमुक्त समाज निर्माण गर्ने आफ्नो मुख्य एजेन्डामा गुरुङ दृढ देखिएकी छन्।
यसैबीच, रास्वपा कास्की क्षेत्र नं. ३ ले पोखरा–२३ मा वडा कार्यालय सम्पर्क तथा पार्टी कार्यालयको औपचारिक उद्घाटन गरेको छ। सोही अवसरमा आयोजित पार्टी प्रवेश कार्यक्रममा ठूलो संख्यामा स्थानीयहरू रास्वपामा आबद्ध भएका छन्। यसले कास्की–३ मा घण्टीको पक्षमा माहोल बन्दै गएको संकेत गर्दछ। गुरुङले मतदाताको विश्वासलाई निस्वार्थ सेवामार्फत प्रमाणित गर्ने प्रतिबद्धता व्यक्त गरेकी छन्।
