कास्की – राष्ट्रिय स्वतन्त्र पार्टी (रास्वपा) ले आगामी उपनिर्वाचनलाई लक्षित गर्दै कास्की क्षेत्र नं ३ मा आफ्नो चुनावी गतिविधि तीव्र पारेको छ। यस क्षेत्रकी उम्मेदवार विना गुरुङले पछिल्ला दिनहरूमा सम्पर्क कार्यालयको स्थापना र घरदैलो अभियानलाई जोड दिनुभएको छ।
रास्वपाले क्षेत्र नं ३, वडा नं. २३, बाम्दीमा पार्टीको सम्पर्क कार्यालय शुभारम्भ गरेको छ। कार्यालय स्थापनासँगै पार्टीका नेता, कार्यकर्ता र स्थानीय नागरिकको समन्वयमा चुनावी अभियानलाई थप व्यवस्थित बनाइएको छ।
उम्मेदवार गुरुङले पोखरा महानगरपालिकाका विभिन्न वडामा घरदैलो तथा भेटघाट कार्यक्रम गर्नुभएको छ। विशेषगरी पोखरा–२४ अन्तर्गतका पाटेश्वारा, रानीश्वारा र कास्कीकोट मौलामा महिला मतदाता (दिदी–बहिनी तथा आमाहरू) बाट उहाँले अपार समर्थन प्राप्त गर्नुभएको छ।
गुरुङले महिलाहरूको यो अपार साथले आफूलाई अझ जिम्मेवार भएर अगाडि बढ्न प्रेरित गरेको बताउनुभएको छ। उहाँका अनुसार, “पाटेश्वारा, रानीश्वारा तथा कास्कीकोट मौलामा दिदी–बहिनी तथा आमाहरूबाट प्राप्त अपार जोश र स्नेहले राष्ट्रिय स्वतन्त्र पार्टीलाई अझ जिम्मेवारीपूर्वक अगाडि बढ्न प्रेरित गरेको छ।”
रास्वपाले यसपालिको चुनावमा परिवर्तन र सुशासनका लागि ‘घण्टी बजाऔँ’ भन्ने मूल नारासहित मत मागिरहेको छ। उम्मेदवार गुरुङले महिलाहरूको प्रतिनिधित्वलाई सदनसम्म पुर्याउन र जनताको सेवा गर्ने अवसर पाए देश र जनताको हितमा काम गर्ने प्रतिबद्धता व्यक्त गर्नुभएको छ।
