कास्की – आगामी उपनिर्वाचनको तयारीसँगै राष्ट्रिय स्वतन्त्र पार्टी (रास्वपा) कास्की क्षेत्र नं ३ की उम्मेदवार विना गुरुङले आफ्नो चुनावी अभियानलाई सघन बनाउनुभएको छ। मतदातासँग प्रत्यक्ष भेटघाट र पुराना नेतृत्वप्रति तीव्र आलोचनासहित गुरुङले चुनावी माहोल तताउनुभएको हो।
हालै गोस्तेघाट, लामाचौर, शुक्लागण्डकी टोल सुधार समिति लगायतका स्थानहरूमा परिचय तथा भेटघाट कार्यक्रमहरू भव्यताका साथ सम्पन्न भएका छन्। यी कार्यक्रमहरूमा गुरुङले आपसी चिनजान, सद्भाव र एकतालाई आफ्नो शक्तिको रूपमा परिभाषित गर्नुभएको थियो। उहाँले भन्नुभयो, “आपसी चिनजान र एकता नै हाम्रो शक्ति हो।”
यसैगरी, मिति २०८२/१०/२१ गते चारभञ्ज्याङ तमु समाजद्वारा आयोजित भेटघाट तथा सम्मान कार्यक्रम, पोखरा–९, नयाँबजारमा पनि उहाँले व्यापक समर्थन प्राप्त गर्नुभएको छ।
अभियानका क्रममा नेतृ गुरुङले देशको नेतृत्व गरिरहेका पुराना राजनीतिक दलहरूलाई सीधा प्रश्न गर्दै भन्नुभयो, “समस्या देशमा छैन। समस्या देश हाँक्न नसक्नेहरूमा छ।” उहाँले जनताको समर्थन र हौसलालाई परिवर्तनको आधारशीला मान्दै ‘परिवर्तनका लागि’ आफूलाई विश्वास गर्न मतदातालाई आह्वान गर्नुभएको छ। उहाँले टोलबासीहरूबीचको सहकार्य र सहभागितालाई सुनिश्चित गर्दै जनताको माझबाटै बलियो शक्ति निर्माण गर्ने लक्ष्य राख्नुभएको छ।
तस्बिरहरू
