कास्की – राष्ट्रिय स्वतन्त्र पार्टी (रास्वपा) ले कास्की क्षेत्र नं ३ मा आगामी संघीय निर्वाचनको तयारी तीव्र पारेको छ। यस क्षेत्रकी उम्मेदवार बिना गुरुङले परम्परागत राजनीतिक शैलीभन्दा फरक तरिका अपनाउँदै जनसहभागितामा आधारित ‘वाचापत्र’ तयार गर्ने घोषणा गरेकी छन्।
गुरुङको सचिवालयले पोखराका सहरी वडाहरूदेखि अन्नपूर्ण र माछापुछ्रेका पदयात्रा मार्गसम्मको भौगोलिक विविधतालाई सम्बोधन गर्ने गरी नीतिगत सुझाव आह्वान गरेको छ। यसका लागि पार्टीले ‘वाचापत्र’ मा समावेश गरिने विषयवस्तुहरू संकलन गर्न गुगल फर्ममार्फत जनताका समस्या र नीतिगत आवश्यकताहरू माग गरिरहेको छ।
रास्वपाका अनुसार उनीहरू ठूला र पुरा नहुने घोषणाहरूको पक्षमा छैनन्। उम्मेदवार गुरुङले सामाजिक सञ्जालमार्फत स्पष्ट पारेकी छन्, “हामी परम्परागत दलहरू जस्तो ठूला ‘घोषणा’ मात्र गर्ने पक्षमा छैनौँ; हामी त्यही कुरा मात्र लेख्छौँ जुन हामी पुरा गर्ने वाचा गर्छौँ।”
उनले संघीय सांसदको मुख्य भूमिका नीति निर्माण रहेकोमा जोड दिँदै भनिन्, “संघीय सांसदको मुख्य काम नीति र कानुन निर्माण मार्फत देश बदल्ने हो।” गुरुङले आफ्नो अभियानमा भ्रष्टाचार नियन्त्रणलाई प्राथमिकता दिँदै “भ्रष्टाचारीको सातो जान्छ घण्टी बजेपछि” भन्ने नारालाई पनि जोडका साथ उठाएकी छन्। संस्कृति, प्रकृति र सम्भावनाले भरिएको अन्नपूर्ण गाउँपालिकालगायत सम्पूर्ण क्षेत्रको विकासका लागि रास्वपा ‘गरेरै देखाउँछौं, बहाना अब छैन’ भन्दै आफूलाई परिवर्तनको संवाहकका रूपमा प्रस्तुत गरिरहेको छ।
तस्बिरहरू
