कास्की – आगामी निर्वाचनको सरगर्मी बढेसँगै कास्की निर्वाचन क्षेत्र नं. ३ मा राष्ट्रिय स्वतन्त्र पार्टी (रास्वपा) की उम्मेदवार विना गुरुङले आफ्नो चुनावी अभियानलाई तीव्र पार्नुभएको छ। उहाँले अन्नपूर्ण गाउँपालिकाका विभिन्न वडाहरूमा पुगेर मतदाताहरूसँग प्रत्यक्ष भेटघाट र आत्मीय संवाद सुरु गर्नुभएको हो।
आफ्नो घरदैलो अभियानका क्रममा गुरुङले अन्नपूर्ण गाउँपालिका–४, सल्याँनमा शहीद कृष्ण बहादुर गुरुङको शालिकमा माल्यार्पण गर्दै श्रद्धाञ्जली अर्पण गर्नुभयो। सो अवसरमा उहाँले शहीदको त्याग र बलिदानलाई भुल्न नहुने बताउँदै भन्नुभयो, “राष्ट्र र समाजका लागि उहाँले दिनुभएको योगदान, त्याग र बलिदान सधैं प्रेरणाको स्रोत रहनेछ।” शहीदले देखाएको मार्गमा हिँड्दै समाजमा सकारात्मक परिवर्तन ल्याउन आफू प्रतिबद्ध रहेको उहाँले उल्लेख गर्नुभयो।
चुनावी प्रचारप्रसारकै क्रममा उम्मेदवार गुरुङले अन्नपूर्ण गाउँपालिकाका वडा नं. १ (ढिकुरपोखरी), २, ३, ४ र ५ अन्तर्गतका विभिन्न क्षेत्रमा पुगेर स्थानीय दाजुभाइ तथा दिदीबहिनीहरूसँग संवाद गर्नुभएको छ। मतदाताहरूको घरआँगनमा पुग्दा उहाँले पाउनुभएको माया र सद्भावले आफूलाई नयाँ ऊर्जा प्रदान गरेको बताउनुभयो।
जनताको प्रतिक्रियाबाट निकै उत्साहित बन्नुभएकी गुरुङले भन्नुभयो, “यहाँहरूको माया, विश्वास र परिवर्तनप्रतिको दृढ चाहनाले हामीलाई अझ जिम्मेवार र उत्साहित बनाएको छ।” स्थानीय बासिन्दाले राखेका चासो र अपेक्षालाई सम्बोधन गर्दै उहाँले अबको राजनीति विकास र सुशासनको हुनुपर्नेमा जोड दिनुभयो। कास्की ३ का मतदातामा देखिएको परिवर्तनको लहरले नै देशको भविष्य सुनिश्चित गर्ने र रास्वपाले त्यसको सही नेतृत्व गर्ने उहाँको दाबी छ।
तस्बिरहरू
