कास्की – आगामी निर्वाचनको मिति नजिकिएसँगै कास्की क्षेत्र नम्बर ३ मा राष्ट्रिय स्वतन्त्र पार्टी (रास्वपा) की उम्मेदवार बिना गुरुङले आफ्नो चुनावी अभियानलाई तीव्रता दिनुभएको छ। “परिवर्तनको निर्णय नजिकिँदै छ” भन्दै उहाँले मतदाताहरूसँगको भेटघाट र घरदैलो कार्यक्रमलाई सघन बनाउनुभएको हो।
चुनावी प्रचारप्रसारका क्रममा उम्मेदवार गुरुङले हालै माछापुच्छ्रे गाउँपालिका–०७, धम्पुसका स्थानीय बासिन्दाहरूसँग भेटघाट तथा छलफल गर्नुभयो। स्थानीयको न्यानो स्वागत र समर्थनबाट उत्साहित देखिनुभएकी गुरुङले भन्नुभयो, “परिवर्तन सम्भव छ, जब जनता जागरुक र एकजुट हुन्छन्।” उहाँले उनीहरूले देखाएको आत्मीय मायाप्रति आभार प्रकट गर्दै जनताका अपेक्षालाई सम्बोधन गर्ने वाचा गर्नुभयो।
आफ्ना प्रमुख एजेन्डाहरू स्पष्ट पार्दै उम्मेदवार गुरुङले देशका न्यायालय र अन्य स्वतन्त्र अङ्गहरूमा हुने राजनीतिक नियुक्तिको पूर्ण अन्त्य गर्ने दृढता व्यक्त गर्नुभएको छ। उहाँले भन्नुभयो, “सांसद भएपछि जवाफदेही, उत्तरदायी र निष्पक्ष रहन म दृढ प्रतिबद्ध छु।” शासन व्यवस्थामा न्याय र समानता कायम गर्ने उहाँको मुख्य संकल्प रहेको छ।
विशेषगरी समाजका ओझेलमा परेका वर्गका सवाललाई सदनमा प्राथमिकताका साथ उठाउने उहाँको योजना छ। उहाँले अगाडि भन्नुभयो, “म महिला, बालबालिका र आमा–बुवाको आवाज बनेर संसदमा बोल्नेछु।” मतदानका लागि अब १२ दिन मात्र बाँकी रहेको उल्लेख गर्दै उहाँले ‘घण्टी’ चिह्नमा मतदान गरी देशमा जिम्मेवार शासन पद्धति स्थापना गर्न मतदाताहरूलाई अपिल गर्नुभएको छ।
तस्बिरहरू
