कास्की – आगामी निर्वाचनको सरगर्मी बढेसँगै कास्की क्षेत्र नं. ३ मा राष्ट्रिय स्वतन्त्र पार्टी (रास्वपा) की उम्मेदवार बिना गुरुङले आफ्नो चुनावी अभियान र घरदैलो कार्यक्रमलाई तीव्र पार्नुभएको छ। “बिना डर, बिना लोभ—परिवर्तनका लागि दृढ उभिएकी आवाज” भन्ने मुख्य संकल्पका साथ उहाँ अहिले मतदाताहरूको घरदैलोमा पुगेर जनसमर्थन जुटाइरहनुभएको छ।
अभियानका क्रममा उम्मेदवार गुरुङले पोखरा महानगरपालिका वडा नं. ५ र हेम्जा क्षेत्रका स्थानीय दाजुभाइ तथा दिदीबहिनीहरूसँग प्रत्यक्ष संवाद र भेटघाट गर्नुभएको छ। मतदाताहरूसँगको आत्मीय संवादका क्रममा उहाँले भन्नुभयो, “तपाईंहरूको माया, विश्वास र परिवर्तनप्रतिको दृढ चाहनाले हामीलाई अझ जिम्मेवार र उत्साहित बनाएको छ। हेम्जा र पोखराका जनताले देखाउनुभएको यो अपार समर्थन नै हाम्रो शक्तिको मुख्य आधार हो।” उहाँले जनताको सान्त्वना र ऊर्जाले आफूलाई अझ धेरै काम गर्न प्रेरित गरेको उल्लेख गर्नुभयो।
राजनीतिक एजेन्डाका साथै गुरुङले सामाजिक र सांस्कृतिक सद्भावलाई पनि उत्तिकै प्राथमिकता दिनुभएको छ। हालै मगर दिवसको अवसरमा शुभकामना आदानप्रदान गर्दै उहाँले भन्नुभयो, “मगर समुदायको इतिहास र संस्कृति हाम्रो साझा गर्व हो। पुर्खाहरूको बलिदानले हाम्रो अस्तित्व मजबुत छ, त्यसैले भाषा र भेषभूषा जोगाउनु हाम्रो साझा दायित्व हो।”
एकता र आत्मसम्मानलाई मुख्य एजेन्डा बनाएकी गुरुङले कास्की ३ मा घण्टीप्रतिको बढ्दो आकर्षणले आफूलाई उत्साहित बनाएको बताउनुभयो। स्थानीय बासिन्दासँगको भेटमा उहाँले आफूहरू सधैँ जनताको साथमा रहेको र एकताबद्ध भएर अघि बढ्ने प्रतिबद्धता समेत व्यक्त गर्नुभएको छ। रास्वपाको बढ्दो प्रभाव र गुरुङको सक्रियताले यस क्षेत्रको चुनावी प्रतिस्पर्धा रोचक बन्ने देखिएको छ।
तस्बिरहरू
