कास्की – आगामी निर्वाचनको मिति नजिकिएसँगै कास्की क्षेत्र नम्बर ३ मा राष्ट्रिय स्वतन्त्र पार्टी (रास्वपा) की उम्मेदवार बिना गुरुङले आफ्नो चुनावी अभियानलाई निकै तीव्र पार्नुभएको छ। “घण्टी बजाऔँ, भविष्य बदलाऔँ” भन्ने मूल नाराका साथ चुनावी मैदानमा होमिनुभएकी गुरुङले यतिबेला मतदाताहरूको घरदैलोमा पुगेर जनसमर्थन जुटाइरहनुभएको छ।
प्रचारप्रसारकै क्रममा उहाँले आज पोखरा महानगरपालिका–१८ लगायतका विभिन्न क्षेत्रहरूमा स्थानीय दाजुभाइ तथा दिदीबहिनीहरूसँग भेटघाट र आत्मीय संवाद गर्नुभएको छ। मतदाताहरूसँगको भेटपछि उहाँले भन्नुभयो, “यहाँहरूको माया, विश्वास र परिवर्तनप्रतिको दृढ चाहनाले हामीलाई अझ जिम्मेवार र उत्साहित बनाएको छ।” गुरुङले आमा–बुबादेखि नयाँ पुस्ता (Gen Z) सम्मका सबै मतदाताहरूको भरोसा रास्वपामाथि रहेको दाबी समेत गर्नुभयो।
निर्वाचनको अन्तिम तयारी भइरहँदा उम्मेदवार गुरुङले अबको केही दिनमा हुने निर्णयले देश र क्षेत्रको भविष्य तय गर्ने उल्लेख गर्नुभएको छ। उहाँले भन्नुभयो, “अब परिवर्तनको बेला आयो। घण्टी प्रेमीहरूको यो उत्साहले हाम्रो क्षेत्रमा नयाँ राजनीतिक तरंग ल्याएको छ।” जनताको सुख–दुःखमा सँगै रहने र जनभावना अनुसार काम गर्ने प्रतिबद्धता जनाउँदै उहाँले समग्र कास्कीको विकास र राजनीतिक शुद्धीकरणका लागि आफूलाई मतदान गर्न अपिल गर्नुभएको छ। चुनावको मिति नजिकिँदै गर्दा कास्की ३ मा रास्वपाको पक्षमा जनलहर बढ्दै गएको उहाँको दाबी छ।
तस्बिरहरू
