कास्की – आगामी फागुन २१ गते हुने निर्वाचनका लागि राष्ट्रिय स्वतन्त्र पार्टी (रास्वपा) की कास्की क्षेत्र नम्बर ३ की उम्मेदवार बिना गुरुङले आफ्नो चुनावी घरदैलो र प्रचारप्रसार अभियानलाई निकै तीव्रता दिनुभएको छ। यसै सिलसिलामा उहाँले पोखरा महानगरपालिकाका विभिन्न वडाहरूमा पुगेर स्थानीय बासिन्दासँग प्रत्यक्ष संवाद र भेटघाट गर्नुभएको छ।
पोखरा महानगरपालिका–२३ स्थित सिदाने र पोखरा–१९ को गोस्ती क्षेत्रमा आयोजित भेटघाट कार्यक्रममा उहाँले मतदाताहरूको उत्साहजनक सहभागिता र न्यानो स्वागत पाएको बताउनुभयो। स्थानीय बासिन्दासँगको आत्मीय संवादपछि उहाँले भन्नुभयो, “यहाँहरूको माया, विश्वास र परिवर्तनप्रतिको दृढ चाहनाले हामीलाई अझ जिम्मेवार र उत्साहित बनाएको छ।” गुरुङले जनताका सुझाव र आशिर्वादले आफूलाई थप ऊर्जा प्रदान गरेको समेत उल्लेख गर्नुभयो।
आफ्ना भावी योजनाहरू प्रस्तुत गर्दै उम्मेदवार गुरुङले कास्की क्षेत्र नम्बर ३ को समग्र विकासका लागि पर्यटन प्रवर्द्धन, महिला सशक्तिकरण र बालबालिकाको हक–हितलाई आफ्नो मुख्य एजेण्डा बनाउनुभएको छ। उहाँले यी विषयहरूमा संसदमा बलियो आवाज उठाउने प्रतिबद्धता व्यक्त गर्दै भन्नुभयो, “कास्कीको समृद्धिका लागि घण्टी चिन्हमा मतदान गरी मलाई भारी मतले विजयी गराउनु हुनेछ भन्ने पूर्ण विश्वास लिएको छु।”
मतदाताहरूलाई सचेत गराउँदै उहाँले “सोच–विचार गरेर र विवेकपूर्ण ढंगले मतदान गर्न” विशेष अपिल गर्नुभएको छ। “सही निर्णयले नै हाम्रो भोलि सुरक्षित र उज्ज्वल बनाउँछ,” भन्दै उहाँले सुन्दर भविष्यका लागि यस पटक परिवर्तनको पक्षमा उभिन सबैलाई आग्रह गर्नुभयो। स्थानीय स्तरमा उहाँको पक्षमा सकारात्मक माहोल सिर्जना हुँदै गएको रास्वपाका कार्यकर्ताहरूले बताएका छन्।
तस्बिरहरू
